|
| |
|
| |
| |
上星期一晚，我喺汀九的屋企被非法入境者爆格，唔見咗幾百蚊同三把孖人牌刀，佢哋仲食晒屋內嘅乾糧，飲晒啲維他奶、檸檬茶，不過天網恢恢，最終警察都捉到嗰班賊，其實點都關今年我犯太歲嘅事！
之前我仲有兩個同樣犯太歲嘅朋友相繼被偷去銀包，唉，而我亦喺投資上較去年失利，好似股票咁，睇中起跌浪，但timing上有出入，賺少咗好多，所以依家就算有中央豪擲四萬億元人民幣挽救經濟嘅措施，我亦唔會再重鎚落去。我之前的股票，喺最勁3萬幾點已經沽走八、九成，再跌到兩萬點左右嗰時，覺得抵買又相繼買入，喺早段跌至萬六點左右已同大家講咗我個人嘅股票倉已滿額，就算依家再跌我都唔會輕舉妄動。
以我個人嘅投資經驗，美國的經濟問題真係仲未浮晒上面，加上今年同2009年都係「大水年」，經濟波動，股市升跌嘅波動都會好大，任何人都唔應該瞓身投資咁白癡。而一宜以來，股票只佔我身家百分之五，所以暫時個市點升點跌，都影響唔到我。沙塵啲咁講，：郁極都係我荷包面嗰層啫。
揸住收息
我嘅投資方法，係每年都會攞手頭上5%嘅資金嚟買股票，今年都去到年尾啦，我唔會再掂住嘞，之不過如果有fans要問我關於買股票嘅心水，我反而覺得可以睇下公用股，煤氣、電力咁啦，長揸唔怕，都有唔錯嘅股息，個市點跌佢哋都唔會跌殘。嗱，最後要奉勸各位屬鼠加埋係寒命嘅朋友，千其唔好掂「消息股」，皆因犯太歲嘅氣會延伸至明年新曆8月8日，仲有流年亦唔係咁夾，呢啲係關個人運嘅事，股票唔係「估票」，拎住現金會著數啲架！
|
|
| |
|
 |
|
