蘇師傅出食譜？

又訪問蘇師傅，為的不是叫他講鼠年運程，全因蘇師傅要出食譜！來到蘇師傅青山公路的家，其實有點「示範單位」feel，連廚房都潔淨過人，沒甚人氣；偷偷打開比人還高的雪櫃，雖然不至於空洞如無物，但除了大量的醬料外，就沒有甚麼食材。「梗係啦，我同女友都唔度住，買返擺咩？」對喎，愛蒲的蘇師傳是住九龍區喎！

雖然無氈無扇，但蘇師傅的確有備而來。走到廚房，把預先浸透的發菜、冬菇、蠔豉，加上上湯、蠔油、糖等調味料放進鍋裡去，兜兩兜，就跑了出客廳跟主持進行錄影，眼尾都無看一看鍋中的食物。「唉，煮兩味有幾難？」

的確不是難事，只要你看過早前蘇師傅的旅遊節目，就會看到他和女友兩人在巴西阿瑪遜河流域的森林酒店內，煮出十幾人吃的家常中菜，令無啖好食的拍攝組員吃得食指大動。這一集我都有看過，雖然隔著熒光幕吃不到其味，但觀乎他兩弄出來的煎魚、肉餅， 至少樣樣有姿勢，就連酒店內的洋人住客，都試圖放棄酒店內超難食的西餐，想向他們討飯吃。就是這個「處男作」吸引到出版社，找他露兩手，合作出版食譜。很多人都祈望可以從他的食譜裡知道「食乜可催運」，不過蘇師傅預告：「咁呢噱頭，點都有少少，不過都唔到成本書十分之一，大家唔好幻想太多。」收到！

簡單家常菜就是美味之源
「其實都係機緣巧合，玩。」於是乎蘇師傅抽了幾天時間，一口氣煮了二、三十個不同菜式。「平時煮飯聲就搞掂，點知一到示範影相，又要慢慢做慢慢影，辛苦過平時開工！」講到有哪個撚手名菜，平時牙擦擦的他謙稱懂得煮的都是尋常不過的「家常小菜」，但言談間總會露出其得戚本色。「我都幾鍾意用冰糖、老抽去煮圓蹄，後來發覺原來同雪園個『紅燒圓蹄』係一樣味道，證明我都有天份！」至於有否期望可以銷書幾多冊、翻印幾多版，他就看得相當淡然。「玩，唔理得咁多，一切隨緣囉......」當然，睇相booking多得要推的他，又怎會把出食譜當成一回事呢？

九個字煮一餐
向來給人愛wet愛蒲、工作又忙碌的蘇師傅，其實從小就「自己煮自己食」，只因兄弟多、父母又工作纏身，一定要自己搞掂，久而久之練得一身好本領，豆豉蒸雞、發財好市等等都難不到他。他說：「其實一個星期，我都有三、四晚在屋企食飯，而且都係我同女友兩個煮！」無理由要自己煮到一頭煙，不讓家傭做菜吧？「菲傭、印傭邊識煮中國呀？叫佢買都還可以。」更何況，在他眼中燒飯煮菜其實不過是easy job。「只要你有個雙頭爐、電飯煲，煲落啖湯後放入真空煲，之後左邊蒸飯右邊炒菜...... 三一湯，九個字搞掂晒！」我平日都有煮飯，但都要個多小時才煮好。「多個一個鐘？唔合格囉！」師傅得戚地道。

錄影暫停，師傅就急急腳走到廚房，把文火煨煮的發菜、冬菇和蠔鼓盛起來，讓大家試一試。我試過，跟我媽媽煮出來的味道一模一樣，冬菇吸收了蠔油和蠔豉的鮮味，不太鹹、不太油膩，是「家」的口味。

蘇師傅果然比許多女生都更「入得廚房」，難怪他可以如此得戚！